Plaku i Krishtlindjeve, Ali Xhaka nga Llapi
Ali Xhaka-Plaku i Krishtlindjeve në Prishtinë

24 dhjetor 2009, Dojçe Vele. Mbi 65 mijë katolikë në Kosovë përkujtojnë lindjen e Krishtit, si një festë të ardhjes së dritës për njeriun me urimet për një jetë në paqe, begati dhe lumturi.

 

 Në sheshin “Nëna Terezë” në qendër të Prishtinës ndriçuar nga drita fosforeshente dhe me bredhin e Krishtlindjeve në mes, zilet e kuajve të karrocës së Babadimrit dëgjohen nga larg… Edhe sivjet petkun e Plakut të Krishtlindjeve e ka veshur Ali Xhaka nga Llapi, i cili me grupin e tij e kompleton këtë panoramë Krishtlindjesh duke ofruar shumë gjëra për familjet dhe fëmijët.

“Më së pari ofrojmë për njerëzit fjalë t´mira. E për fëmijët kemi pajtonin me kuaj ku i ulim fëmijët në mes të këtyre çikave, princeshës, lepurushit dhe ky djali na fotografon.”

Karroca shumengjyreshe e Babadimrit

Pranë Plakut të Krishtlindjeve është edhe princesha, e cila në të vërtetë quhet Visare dhe studion për gazetari.

“Uroj më shumë dashuri mes njerëzve dhe më shumë ndihmë për të varfërit dhe fëmijët bonjak” – thotë princesha e Babadimrit, sepse ajo sheh në mëngjes e mbrëmje se këtu nuk ka vetëm fytyra të qeshura njerëzish që kremtojnë, por ka edhe fëmijë e prindër që në rrugë i nxjerr vetëm halli.

Fadili, një nga shitësit në rrugë, i cili e siguron ekzistencën e familjes së tij katëranëtarëshe duke shitur kikirikë e gështenja thotë:”Mu, baba m´ka punu tanë jetën me gështenja, misra e akullore. Gjithmonë kështu kena shit në rrugë. Po, edhe kështu mund të jetohet, por, shteti s´na i ka dhanë lejet qe dy vjet. E dëshira jeme do të ishte me ec puna mbarë për t´gjithë në Kosovë. Të punësohen njerëzia.”

“Gëzuar Krishtlindjet!” edhe nga Peruja

Peruanë shqipfolës në Kosovë

Në rrugë janë dy muzikantë të rinj nga Peruja, me flokë të gjatë dhe veshjet e tyre tradicionale. “Ngaqë Kosova është vend i bukur dhe me njerëz të mirë që e pëlqejnë muzikën tonë, ne kemi filluar të mësojmë edhe shqip, p.sh. faleminderit dhe gëzuar” – thotë 33-vjeçari Percy Vilca Carbajal, i cili edhe na e uron në shqip festën e Krishtlindjeve, “Gëzuar Krishtlindjet!”

Dashuria ndaj jetës ngadhnjen mbi çdo sprovë

Mesazhin e Krishtlindjeve Dr. Don Lush Gjergji, prift katolik i Ipeshkvisë Shkup-Prizren, e shoqëron me dëshirën që çdo besimtar, pa dallim etnie apo feje të ushqejë dashuri ndaj jetës.

“Sepse, dashuria ndaj jetës ishte karakteristika e cila na ka bërë të

Dr. Don Lush Gjergji

mbijetojmë shumë sprova, shumë shekuj. Kemi pasur një flijim dhe një dashuri të jashtëzakonshme si për jetën e re, lindjen e fëmijëve si për jetën e të moshuarve me atë thënien e mrekullueshme se “nuk ka shtëpi pa pleq dhe pa fëmijë dhe aty ku ka pleq e fëmijë, vetëm aty ka shtëpi”. E unë do të shtoja, aty ka edhe dashuri!”

Në Kosovë jetojnë mbi 65 mijë katolikë, pjesa dërmuese e të cilëve janë të vendosur në komunën e Gjakovës. Pjesa tjetër jetojnë në rajonin e Pejës, të Anamoraves dhe të Prishtinës, kurse rreth 45 mijë të tjerë jetojnë në diasporë.

http://www.dw-world.de/dw/article/0,,5054639,00.html 

Leave A Comment

Your email address will not be published.