Lufta imponoi zhvendosjen e familjeve nga Shqipëria në Kosovë

Disa familje nga Shqipëria janë shpërngulur në Kosovë. Pamje nga fshatrat e Gjilanit
Disa familje nga Shqipëria janë shpërngulur në Kosovë

20 nentor 2009, Dojce Vele & Radio Kosova, Në periudhën janar-shtator të këtij viti, në Drejtorinë për Migrim dhe të Huaj në kuadër të Policisë Kufitare te Kosoves, për leje qëndrimi kanë aplikuar 224 shtetas të Shqipërisë. Ministria për Punë dhe Mirëqenje Sociale e Kosovës ende nuk ka një evidence se sa prej këtyre qytetarëve janë në marrëdhënje pune. Njërz ndër familjet e shpërngulura në Republikën e Kosovës është edhe familja tropojane Memijaj, e cila tash dhjetë vjet është shërngulur në një fshat të Decanit.

Në Tropojë, afro dhjetë kilometra matanë kufirit që ndan Kosovën me Shqipërinë, familja Memijaj u formua e u rrit deri në luftën e Kosovës, kur njëri nga djemtë e saj hyri në radhët e Ushtrisë Çlirimtare të Kosovës dhe pas përfundimit të luftës tërhoqi familjen në Kosovë. Dhe lagja Dëshmorët e Kombit, në fshatin Baballoq, rreth 20 kilometra brënda brezit kufitar u bë vendbanimi i ri i kësaj familjeje dhjetëanëtarëshe. Para dhjetë vjetësh ajo braktisi vendlindjen me shpresën për një të ardhme më të mirë në shtetin e Kosovës, i cili po lindte atëherë…
“Për shkak se vëllai është invalid i luftës dhe është i madhi në familje, ne e kemi ndjekur atë, sepse tradita e shqiptarëve është me jetu t´gjithë s´bashku“– shpjegon Flora Memijaj, bija e madhe e kësaj familjeje.Dhe kështu, në këtë fshat, rreth 15-të kilometra në juglindje të Decanit, familja Memijaj prej një dekade ka ndërtuar një jetë të re, me burimin e ekzistencës në blegtori.
“Kemi dele, rreth 150 copë, sqaron Flora. I kullosim nëpër fusha dhe ushqimin për dimër ua sigurojmë gjatë vjeshtës, në tokat e marra me qira. Nga blegtoria mund të jetohet, por edhe vështiresi ka…”.
Dhe këto vështirësi vazhdojnë. Megjithëse shumica e shtetasve të Shqipërisë tashmë kanë zënë vend nëpër shumë institucione kosovare dhe ndërkombëtare, varësisht nga përgatitja profesionale, ekonomia e pazhvilluar në Kosovë mban larg punësimit edhe vetë kosovarët. Ylberja, megjithëse në Tropojë punonte si infermiere, në Kosovë ende nuk ka arritur të fillojë punë.
Blegtoria,ende burim ekzistence për shumë familje shqiptare
„Në Tropojë kam punu si motër medicinale dhe kur erdha këtu, pa punë jetoja disi…Se çdo njeri ka nevojë për punë. Kam ba vullnetare tek Spitali i Gjakovës, por e kam ndërprerë, derisa të marr edhe ca dokumente, që vërtetojnë se jetoj në Kosovë”, thotë Ylberja.
Martesa me djalë nga Kosova nuk përbën dilemë
Me gjithë dallimet e vogla dialektore dhe zakonore, duke pasur të njëjtën gjuhë, kulturë dhe traditë, shtetasit e Shqipërisë janë pranuar mirë nga kosovarët, megjithëse fillimi nuk është gjithmonë i lehtë.
„N´fillim, s´di…-flet Ylberja.Vërtet nuk u ndjeheshim mirë, se kanë qënë ato ndasitë jo nga Shqipëria- jo nga Kosova. Por, tash jam ambientu dhe ndjehem vërtet mirë. Ndjehem si e shpisë!”-kujton Ylberja, për të cilën edhe martesa me djalë nga Kosova nuk përbën dilemë.“Unë s´mund të bëj dallime të tilla Ka rëndësi të ketë gjak shqiptari dhe për mua nuk përbën problem është nga Kosova apo nga Shqipëria. Dhe, po e gjeta një djalë të mirë besoj se më parë do të martohem në Kosovë, meqë tash jetoj këtu.”
Shtetasit e Shqipërisë meritojnë trajtim më të veçantë në Kosovë
Nezir Balaj, zyrtar për kthim dhe integrim në komunën e Decanit thotë se shtetasit e Shqipërisë meritojnë një trajtim të veçantë nga shoqëria në Kosovë.
“Tani ne kemi në mesin tonë qytetarë të Shqipërisë, të cilët kanë kontribuar për lirinë  e Kosovës e të cilët edhe kanë pësuar nga bombardimet serbe në fshatrat kufitare, e si rrjedhojë janë shpërngulur në Kosovë. Prandaj, ne si shoqëri kosovare duhet t´iu japim mundësi atyre që të integrohen dhe t´iu ofrojmë të gjitha mundësitë që kemi.“-thotë Balaj.
Sipas Drejtorisë për Migrim dhe të Huaj në kuadër të Policisë Kufitare, në periudhën janar-shtator 2009 për leje qendrimi në Kosovë kane aplikuar 224 shtetas të Republikës së Shqipërisë. 210 prej tyre e kanë marrë lejen e qëndrimit. Ndërsa, Departamenti për Punë dhe Punësim në Ministrinë për Punë dhe Mirëqenie Sociale të Kosovës, kjo ministri ende nuk ka ndonjë evidencë mbi numrin e shtetasve të Republikës së Shqipërisë të punësuar në Republikën e Kosovës.

http://www.dw-world.de/dw/article/0,,4929063,00.html 

Leave A Comment

Your email address will not be published.