Besimtarët e katolikë në Kosovë, përkujtojnë lindjen e Krishtit, si nje festë të ardhjes së dritës për njeriun me urimet për një jetë në paqe, begati dhe lumturi. Ipeshkvi i Ipeshkvisë së Kosovës, Dodë Gjergji, ka përgëzuar të gjithë besimtarët, duke thënë se kjo është festa e pajtimit, solidaritetit dhe e paqes me Zotin.

„Kershendellat mbi të gjitha është festa e paqes në mes të Zotit dhe njerëzimit. Kosova është në pritjen e fundit të Krishtlindjeve dhe të Vitit të Ri para hapit vendimtar të pavarësisë. Kjo e drejtë themelore dhe e shenjtë na takon edhe neve, andaj falënderojmë Zotin që gjatë kësaj kohe të Kërshëndellave, e tërë bota e qytetëruar e cila këtë begati e shijon që moti, përgatitet të na i njeh këtë të drejtë edhe neve“.

Presidenti i Kosovës, Fatmir Sejdiu, me rastin e Krishtlindjeve, i dërgoi Shenjtërisë së tij, Papa Benediktit të XVI-të një telegram urimi ne emrin e tij dhe të mbarë popullit të Kosovës, me lutjen që të vazhdojë përkushtimin për pavarësinë e Kosovës. Presidenti Sejdiu, i përgëzoi edhe besimtarët katolikë dhe të gjithë qytetarët e Kosovës me rastin e festës së Krishtlindjes. Urime të përzemërta presidenti iu shprehu edhe komandantëve dhe ushtarëve të KFOR-it/ NATO-s, përfaqësuesve të UNMIK-ut dhe të OSBE-së, si dhe përfaqësive diplomatike në Prishtinë.

Ndërkohë, nga shefi Zyrës diplomatike të Britanisë, David Blunt, vjen një urim I veçantë:

„Tash nje vit kam thënë se ka ardhë koha që kaptina e errët në historinë e Kosovës të lihet prapa nesh. Dhe, kjo më së tepërmi vlen tah, në dhjetor 2007. Secili në Kosovë ka të drejtë të shikoje kah e ardhmja më e mirë. Miqtë tuaj në Britaninë e Madhe bashkë me partnerët tuaj kyq, dëshirojnë t´iu ndihmojne juve, popullin e Kosovës, që ta arrini këtë!“

Populli i Kosovës, Natën e Krishtlndjeve e shënoi me manifestime të shumta, ndersa mesha solemne u mbajt mbrëmë në mesnatë, në kishën katolike Shën Ndou, në Prishtinë.

“Kirshtlinjdet I festojmë me ushqime tradicionale, në gjirin e familjes-rrëfen Maria, e cila tashmë po përgatitet për meshën e Krishtlindjeve. Për darkë hamë peshk, me patate apo me oriz. Pastaj, kemi grurë të të zier, paqa të ndryshme, pite me arra, kungull etj.ndërsa si pije tradiconale përdorim raki të vluar me pak sheqer. Pas darkës, shkojmë në kishë ku është shfaqja e fëmijëve të Famullisë. Pas shfaqjes, është mesha solemne e Kërshëndellave ku pas saj dalim dhe festojmë me shoqëri“.

Maria me shoqërinë e saj, ka pritur këtë festë në një atmoferë të dyfishtë gëzimi: nën përcjellje të festës së Kurban Bajramit dhe në pritje të Krishtlindjeve; dy festa sublime të dy besimeve tradicionale në Kosove, të cilat kosovarët i festojnë  në frymën e tolerancës fetare të njohur ndër shekuj.

„Kisha është e mbushur përplot, pa marrë parasysh se cilit besimi dhe etnie i takojnë. Poashtu, shokët dhe shoqet vinë në shtëpinë time t´mi urojnë Krishtlindjet siç veprojmë edhe ne, me rastin e festës së Bajramit“.

Meshat me këngë kishtare, lutje, lexim të fjalëve të Zotit e gjunjëzim para tij, në mbarë Kosovën përfunduan me mesazhin e Krishtlindjeve:

“Paqe në Tokë dhe vullnet të mirë ndaj gjithë njerëzimit”.

Ajete Beqiraj, Dojce Vele