Vatra zjarresh ne Kosove

Ndër shkaktarët kryesor të zjarrit në Kosovë, është faktori njeri si dhe temperaturat e larta që po mbretërojnë në këtë sezon veror-njofton Departamenti për Menaxhim të Emergjencave në Ministrinë e Punëve të Brendshme të´Kosovës.

„Shkalla e deficitit të lagështisë është marramendëse. Në matjet agrometeorologjike, në një metër thellësi, temperatura është 20 gradë C. Që don të thotë, po të binte shi një javë, pandërprerë, nuk do të plotësonte këtë mungesë që është e pranishme në matjet agrometerologjike“-thotë prof.doc.Syle Tahirsylaj, nga Instituti Hidrometeorlogjik I Kosovës.

Vetëm gjatë muajve qershor dhe korrik të këtij viti në komuna të ndryshme të Kosovës nga zjarri janë djegur qindra sipërfaqe të tëra malore dhe fushore. Si rrjedhojë, Komiteti Ndërministror I dalë nga Qeveria e Kosovës për mangjimin e gjëndjes, ndër të tjera ka marrë vendim për ndalimin e ndezjes se çdolloj zjarri në sipërfaqe të hapura.

Zëdhënësja e Qeverise së Kosovës, Ulpiana Lama:

“Ndalohet ndezja e çfarëdolloj zjarri të hapur e posaqërisht, ndezja e mbeturinave dhe fushave te korrura të grurit. Kjo kërkon angazhim shtesë dhe të përpikte të SHërbimit Policor të Kosovës, për implementimin e këtyre masave“.

Sipas Institutit Hidreometeorologjik, temperaturat 38.5 grade C. do të rriten edhe më tej. Por, drejtori Sylë Tahirsylaj, premton zbritje temperaturash gjatë javës.

“Këto temperatura janë shënuar në vitin 1965. Pra, janë procese të përsëritshme. Por, edhe kjo do të jetë kaluese. Kështu që prej ditës së mërkurë do të kemi një zbritje të dukshme temperaturash, prej 6 deri në 10 gradë C. Ndërsa, në muajt e ardhshë nuk do të ketë vlera ekstreme si deri më tash“.

Drejtori I Departamentit për Menaxhim të Krizave, sot e vlerësoi gjwndjen alarmante, duke theksuar se në rreth 40 për qind të komunave të Kosovës janë ngritur qendrat e krizave. Zyrapi përmendi shpërthimin e zjarreve të reja në disa rajone të Kosovës, prej të cilave në gjëndje më kritike janë zona e Rugovës, e Kullës në afërsi të Rozhajës, komuna e Vitisë, ajo e Kamenicës dhe zona e Pashtrikut, duke paralajmwruar mundësinë e përhapjes së zjarrit edhe përgjatë kufirit me Maqedoninë dhe Malin e Zi.

Sipas raportit të Departamentit për Menaxhim të Krizave të Ministrisë së Punëve të Brendshme të Kosovës, vetëm në dy muajt e fundit në territorin e Kosovës janë shkaktuar afro 1.300 zjarre, ku si pasojë janë dëmtuar 4.624.7 hektarë fusha dhe pyje.

Ajete Beqiraj,Dojce Vele