Zyra për Informim e Komandës Qëndrore të Shërbimit Policor të Kosoves, në Prishtinë, me anë të një komunikate njofton për zbulimin e 92.6 kilogramëve eksploziv të llojit TNT, 48.6 prej të cilit në fshatin Vitomirice si dhe 44 kilogram të tjerë, në fshatin Novo Sellë-që të dyja fshatra shumëetnike të komunës së Pejës. Lidhur me rastin janë arrestuar dy persona nën akuzën: “Shkaktim i rrezikut të përgjithshëm dhe Posedim ilegal i Municionit”.

Ndërkohë, Zyra e Shtypit e Komandës Rajonale të SHPK-së, në Pejë, njofton se 6 vatra të reja kanë shpërthyer në komunën e Gjakovës, 3 vatra në Pejë, 2 vatra në Klinë si dhe 2 të tjera, në komunë të Istogut. Njazi Gashi, shef i Njësisë së Zjarrfikësve, në Pejë, thotë se në këtë thatësi, një shkëndijë e vetme mjafton për të shkaktuar zjarre me përmasa të paparashikueshme.

“Nga thatësia e madhe që po mbretëron qe sa kohë, është tharë bari dhe një shkëndijë e vogël mjafton që zjarri përhapet me të madhe. Me shumë probleme na shkaktojnë zjarret fushore, të cilat kapen në mal. Prej datës 20 kemi pas 10 intervenime, në fshatra përreth e në qytet. Ndërsa, vetëm në 24 orëshin e fundit kemi pas diku 9 intervenime. Ndërkohë qqë ekipi ynë po intervenon edhe në Grykën e Deçanit, pranë bazës së Kfor-it te manastiri i Deçanit”.

Shpërthimi i zjarrit në pyjet halore të Deçanit, ka krijuar situatë alarmante. Me gjithë mobilizimin e njësisë së zjarrëfikësve dhe të komponentës rezervë, në Deçan, mbështetja e Njësive Zjarrfikëse të Gjakovës dhe të Pejës, ka qënë e domosdoshme për të parandaluar përhapjen e zjarrit në hektarë të tërë pyjesh me dru industrial. Bashkim Ramosaj, shef i Njësitit të Zjarrfikësve, në Deçan, njofton nga terreni.

“Jemi këtu te Manastiri i Deçanit, duke shuar zjarrin që po zbret prej Podit të Gështenjave deri diku te manastiri i Deçanit dhe është shtri, diku deri në 50 hektarë”.

Sipas Ramosajt, njësitë zjarrfikëse të tri qendrave të Rajonit të Pejës, në orët ë mbrëmjes kanë arritur të lokalizojnë zjarrin, duke parandaluar dëme të reja ekologjike. Ndërkohë, ndër komunat më të prekura nga vala e zjarreve që kaploi Kosovën për një muaj, ka qenë ajo e Pejës, ku sipas Agjencisë Pyjore se Kosovës, zjarret në këtë rajon kanë bërë shkrumb afro 1400 hektarë pyje. Sipas një parallogaritjeje të kësaj agjencie, në tërë vendin janë djegur rreth 4 mijë hektarë pyje. Ndërsa, komisioni për vlerësimin e dëmeve i Ministrisë së Punëve të Brendshme, në fillim të shtatorit pritet te publikojë të dhënat për dëmet e shkaktuara nga zjarret në tërë Kosovën.

Ajete Beqiraj,DW