“Deminimi është kusht elementar për kthim dhe për investime në të ardhmen”-thotë drejtori ekzekutiv i Pilot Njësisë Komunale të junikut,Ruzhdi Shehu.

Agjencioni Evropian për Rindërtim, ka ndarë një shumë prej 1 milion eurosh për kanalizimin e ujërave të zeza. Ndërtimi i objektit të ri të shkollës së mesme me shumën prej 450 mijë eurosh, do të mundësohet nga Buxheti i Konsoliduar i Kosovës, përdërisa për rrugën 7 kilometërshe e cila lidh Junikun me Bajram Currin e Shqipërisë, Ministria e Transportit dhe Telekomunikacionit, e Kosovës, ka ndarë 600 mijë euro. Madje edhe projekti i urbanizmit dhe ai i planifikimit hapësinor financohet nga Banka Botërore. Por, asnjë ndryshim për të zhvendosurit e të dy fshatrave, Jasiç dhe Gjocaj, të cilët vazhdojnë të jetojnë në të 120 shtëpitë e ndërtuara për kolonët serb, në fillim të viteve të ‘90-ta!

„Shpinë ku jetoj e konsideroj si shpi të huaj, përderisa nuk e kam dhënë pare, përderisa baba s’ma ka ble, përderisa gjyshi s’ma ka lanë!-thotë Muhamet Gjocaj, njëri ndër banorët e kësaj lagjeje.

Dikur, me shkollë, ambulancë e me të gjitha kushtet për jetesë, sot te 300 shtëpitë e banuara prej 65 familjeve me rreth 600 banorë, janë vecse gërmadha. Shtrirja e gjërë dhe minimi I dendur në këto zona, ndikoi në zvarritjen e kthimit të të zhvendosurve në vatrat e veta-thuhet në opinion.:

„Organizatat ndërtimore në Kosovë nuk kanë vepru edhe te ne sepse ka njerëz që nuk duan të kthehen në vendilidnjen e tyre. Njerëz të cilët mendojnë se pronat e huaja bëhen të tyre! Me propaganda të tilla kanë bërë zbrapsjen e shoqatave, duke marre në qafë krejt fshatin!“ –demanton Muhamet Gjocaj, deklarata te tilla.

Muhamet Gjocaj, banor I njërit prej të dy fshatrave të depopulluara në Grykën e Junikut, me të dalë pranvera e deri në vjeshte, bashkë me familjen i ngjitet fshatit të tij malor, ku siç thotë:” Punoj tokën pëllëmbë për pëllëmbë dhe jetoj në Gjocaj deri në vjeshtën e vonë”.

" E baj shpinë vet, po nuk kam pare! Nëntë anëtarë familje  jetojmë në dy dhoma. Ma zi se n'luftë!"-thotë Bajram Jasiçi, i cili me dëshirë do t’i kthehej fshatit të tij.

Ndërkohë, nga fshatrat e rrënuara vjen një thirrje:

„Duam të kthehemi në fshatrat e lindjes. Le t’na ndihmohet si të gjithëve, se jemi të djegur e të shkatërruar nga lufta!“

Përkrah Elez Hanit dhe Mamushës, Juniku është pilotnjësia e tretë komunale, në Kosovë.

Ajete Beqiraj,Dojce Vele